8 أسباب للمشاركة فى مسابقة الأهرام الدولية للزيتون

حدد الدكتور أحمد صبري، الباحث في قسم بحوث الزيتون بمعهد بحوث البساتين - بمركز البحوث الزراعية، 8 أسباب لمشاركة المنتجين والمصدرين وأصحاب المعاصر والاستشاريين والمزارعين والمهتمين، في مسابقة الأهرام الدولية لزيت الزيتون.

وقال صبري في تصريحات خاصة لموقع "الأرض"، إن المشاركة في هذه المسابقة الدولية، سواء بغرض التنافس المباشر بالعينات، أو بالدعم المعنوي، أو بالترويج عن طريق النشر، أو الإشهار في أوساط المهتمين بالشجرة المباركة، واجب وطني على كل من يهمه دعم الاقتصاد الوطني المصري، وإعلاء شأن الإنتاج المصري من زيت الزيتون.

وكتب الدكتور أحمد صبري (أحد أهم الاستشاريين في مجال تخطيط ورعاية المشاريع الكبرى المتخصصة في زراعة شجرة الزيتون، كتب على صفحته الخاصة في منصة "فيس بوك"، منشورا يلخص الأسباب التي تدعم ضرورة المشاركة في مسابقة "الأهرام الدولية" لزيت الزيتون، ننشرها هنا:

منشور الدكتور أحمد صبري

واحدة واحدة كده خلينى أقول لحضرتك باختصار شديد ليه مهم إنك تشارك فى المسابقة وماينفعش إنك تحجم عنها ..
١- لأنها أول مسابقة دولية فى مصر ماينفعش مايكونش ليك فيها مكان ودور ومساهمة فى إنجاحها.

٢- لأن هيبقى فيها تحكيم دولى محايد من ناس دارسة وفاهمة كويس إزاى تحكم على الزيت بمعايير دولية وليست بأهواء شخصية

٣- مفيش ما يستدعى الخوف من المنافسة لأن اللجنة هتقول مين أحسن زيت مش مين أسوأ زيت .. يعنى ممكن يكون زيت حضرتك جيد جداً وممتاز كمان، ولكنه ليس الأفضل وده مش عيب ولا حرام ..

٤- هتعرف الزيت بتاع حضرتك مميزاته إيه وعيوبه إيه، لما يوضع فى محك ومقارنات حقيقية مع زيوت أفضل وأقل منه ..

٥- هتكون فرصة عشان نشتغل على أنفسنا وعلى منتجنا فى السنوات القادمة بإذن الله عشان نوصل للأفضل والأجود والأميز.

٦- هتكون فرصة للتعرف على زيوت أخرى من بلدان مختلفة، وبالتالى نقيم زيتنا بشكل جيد وصادق ومتسق مع النفس للوقوف على مرتبته الصحيحة على المستوى الدولى.

٧- هتثبت لناس كتير منافسين وحكام ومهتمين بالشجرة المباركة إنك براند يستاهل على حق البروباجندا وإعلانات السوشيال ميديا، لأنك واثق فى الزيت بتاعك ومش قلقان من المنافسة حتى لو كانت دولية.

٨- مش هيبقى فى أى حرج من عدم الفوز لأن فى زيوت عالمية فى المسابقة فممكن تكون الأفضل محلياً وما تكسبش أى جوائز .. بس الأكيد إن شاء الله إنك هتكتسب خبرة الاحتكاك الدولى والفوز فى السنوات القادمة.