ننشر كلمة السيسي بمؤتمر «رؤية مصر 2030»

قال الرئيس عبد الفتاح السيسى، إننا استطعنا أن نحسن موقفنا مع الدول، فهناك الكثير من الدول تسمع هل القضية محاولة تغيير حكم بالقوة ولا إرادة شعب.. أرادوا التغيير، قائلا: "افتكر إن الأمر بقى واضح مفقدناش علاقة مع حد على كافة الأصعدة آسيا وأفريقيا والصين وروسيا وكوريا ".

وأضاف السيسي، خلال كلمته بمؤتمر "رؤية مصر 2030" بمسرح الجلاء اليوم الأربعاء، أنه لابد من إسكان اجتماعى للمواطنين، كما يجب أن تتخذ الحكومة إجراءات قوية لوقف البناء على الأراضى الزراعية والبناء العشوائى، لنعيش فى مجتمعات عمرانية متكاملة، معندناش خيار آخر".

وأضاف "سنوفر كيانات واعدة للشباب ومشروعات لتوفير الوقت، فكروا تعملوا مجموعه كيانات واعدة للشباب، وندرس مع الشباب والمبلغ المرصود لشباب مصر يكفى ملايين من الناس".

ووجه الرئيس عبد الفتاح السيسى، حديثه إلى المصريين قائلا: "أنتو هتعرفوا أكتر منى.. الحكومة دى كويسة ولا لأ.. وأنا بقعد معاهم كل يوم.. وأنا مش بدافع عن حد.. وهو مسئول الحكومة بياخد أيه علشان يستحملك وتضرب فيه ليل ونهار وفى الجرائد وغيره".

وأضاف السيسى "لو فى حاجة عايزة تتعدل هنعدلها وأرجو إننا نوفر مناخ جيد وحافظوا عليه وشجعوه"، مؤكدا وجود الكثير من التحديات.

وطالب الرئيس بضرورة تناول أداء الحكومة بشكل موضوعى وعلى أسس سليمة.

وقال إن هناك 250 مليار جنيه خدمة الدين، قائلا: "أى أن سلف الدولة حتى عام 2011 كان حوالى 1000 مليار، وخلال الأربع سنوات الماضية أصبح 2000 مليار والرقم الحقيقى أكثر بكثير .

وأضاف الرئيس عبد الفتاح السيسى: "لما الناس التقت بيا فى الحملة قولت الكلام ده أحسن حد يتصور إنى بقول كده علشان موقع الرئاسة، أنا بقوله للناس علشان تبقى عارفة".

وأكد أن أكتر من 50% من مساحة مصر عشوائيات، قائلا "بنتكلم على العدالة الاجتماعية.. والناس مرمية ومصورنهم فى التليفزيون ويقولك فين الحكومة والدولة! وبيعيرونا بفقرنا بس أنا مش هسكت".

وأضاف السيسى "لو إحنا مصريين بجد منمنش إلا لما نبنيها.. ولما حد يوجعنى ببقى مش عايز أرد عليه".

وتابع: "المناطق العشوائية عندنا 4500 قرية فى مصر ولو مخدناش بالنا وتصدينا للمشكلة مظبوط هيبقى بعد 15 سنة فيه 35 ألف قرية عشوائية، وكل الظهير الصحراوى بتاع الصعيد النهاردة يُدرس لإطلاق مساكن فيه علشان نوفر للناس مساكن واللى هتكمل على الأراضى الزراعية".

وقال الرئيس عبد الفتاح السيسي: "صحيح إن الشباب قلق من الفقر المائى، وأنا معاكوا قلقان، فحجم المياه التى يتم معالجتها يوميا 10.5 مليون متر مكعب مياه، منها 8 ملايين معالجة ثنائية، "إحنا بصدد عمل محطات معالجة للمياه خلال العامين القادمين قد اللى اتعملت فى العشرين سنة الماضية".

وأضاف "نصيب المصريين هو دولة بتتبنى وتقوم، من أجل ان تعرفوا أن وراء كل حكاية حكاية كبيرة، هقول الكلام ده بالرغم إنه من منظور الأمن القومى غير صحيح".

وقال السيسى: "فى سد بيتعمل، وهنتفق مع الناس على عدد سنين معينة لكى يبنوا السد، طب الميه اعوضها منين، أسبيب الفلاحين من غير ميه ولا إيه".

وأضاف: "لو سمحتوا اللى يتكلم فى موضوع يدرسه كويس، أو تعلالى، وأنا أقول لك الحكاية إيه لازم تذاكر موضوعك اللى بيتكلوا للناس".

كما استعرض الرئيس السيسى، نجاح الدولة فى تقليل تكاليف المشروعات إلى النصف، مشيرًا إلى أنه طالب من الوزراء بضرورة التدخل فى تفاصيل تكاليف المشروعات للحد من الفساد.

وأضاف أن حجم المياه الذى يصل إلى مصر لم يتغير إلى الآن، ونحتاج إلى 10 ملايين جنيه لمعالجة المياه، ونستهدف 500 ألف متر مكعب من تحلية المياه يوميا، وقد نصل إلى مليون متر مكعب فى السنة.

وأعلن الرئيس عبد الفتاح السيسى، أنه بنهاية عام 2017 سيكون إنتاج مصر من الكهرباء ما يعادل ما أنتجته مصر فى تاريخها، موضحا أن مشكلة الكهرباء لم تكن للمواطن فقط وأيضا للصناعة.

وقال الرئيس السيسى: "علشان الصناعة وأى حد جاى يستثمر وعايز يعمل صناعة أقول له: اتفضل الكهرباء موجود"، وتساءل "كان مين هيجى والكهرباء بتقطع؟".

وتابع: "كان لازم يتعمل كده والموضوع انتهى ودلوقتى إحنا فى الإجراءات اللى على الأرض وبتخلص".

وقال الرئيس، إننا ننشئ ميناء شرق التفريعة على أرقى مستوى، وهناك 9 شركات تعمل الآن، مؤكدا أنه خلال سنتين سيتم الانتهاء منه.

وأضاف السيسى، أنه فى المطارات تم الانتهاء من 3 مطارات ونحصل الآن على العلامات الملاحية، وكل مطار سعته 1.7 مليون راكب.

وقال الرئيس إننا أنجزنا مشروعات الكهرباء والطاقة فى عام واحد بنحو 150 مليار جنيه، مضيفا: "حد يتصور أن يتم القضاء على مشكلة الطاقة فى سنة".

وأضاف أن الكهرباء، وصيانة وإقامة الطرق لم تقل عن هذا المبلغ، وطالب الرئيس السيسى من المصريين بعدم الاستماع إلى أحد قائًلا: ماتسمعوش كلام حد غيرى أنا لا بكدب ولا بلف وبدور فاهم أنا باقول إيه".

وتابع الرئيس: "إحنا هانقطع مصر ولا إيه؟"، أنا مش هاسمح بكده، خالوا بالكوا أنا مش هاسمح بكده ماحدش يفكر إن بطول بالى وخلقى الحسن، قسما بالله اللى هايقرب لمصر لهاشيلوا من على وش الأرض".

وقال: "لدينا نقص فى البنية التحتية، لافتا إلى أنه سيتم الانتهاء من 5 آلاف كيلو متر طرق نهاية العام الجارى".

وأضاف الرئيس عبد الفتاح السيسى: "لدينا نقص حقيقى فى البنية التحتية، قائلا: "أصلا انتو عايشين جوا مصر مش وخدين بالكوا فيه نقص علشان كدة بنحاول نعمل دولة حقيقية والمواطن يبقى حاسسس أنه معزز مكرم ".

وطالب الرئيس عبدالفتاح السيسي، المصريين بضرورة الحفاظ على حالة التوافق المجتمعى التى تشكلت بعد 30 يونيو للحفاظ على مصر.

وأضاف الرئيس السيسي: "نبنى الدولة الديمقراطية فى ظروف صعبة، ومازال هناك الكثير من العمل، ولنسع بعضنا البعض، مشيرًا إلى أن مجابهة الإرهاب بدأت بعد 30 يونيو، مضيفًا: هما اللى بدأوا.. وهناك تجاوزات ولكن لا أرضى عن هذه التجاوزات، لكن المعادلة هى إزاى أحكمها وماتوقعش منى، وفى نفس الوقت مافيش تجاوزات".

وقال: "لا يوجد تواصل حقيقى بين الدولة ومؤسسات الإعلام، ومفيش تواصل حقيقى بشكل منتظم مع مؤسسات الإعلام".

وأكد الرئيس السيسى، أن هناك صراعا يتم معنا ومحاولة لإيقاف البناء والسعى لتدمير البقاء، مضيفا: "لا يمكن حد يستطيع ينال من مصر طول ما المصريين كتلة واحدة".

وخاطب الرئيس الشباب قائلا: "نسعى إلى تجهيز الشباب وتوفير ما أمكن فى ظل ظروفنا، حاجة ممكن تشجعكم ونطمئنكم على بكره.. وفى مشاريع جوه مصر تضم مش أقل من 2 مليون مواطن".

واسترسل، "اللى اتعمل فى السنة ونص اللى فاتوا ميتعملش فى عشرين سنة، وده ليس جهدى أنا بل جهد المصريين.. فالتحية للمصريين" .

وأضاف الرئيس السيسى: بطمن المصريين على بلدهم، ومصر واقفة بخير وأمان وسلام، ومحدش هيقدر عليها.

وأكد الرئيس عبد الفتاح السيسى، على أهمية الاصطفاف الوطنى وأهمية الحفاظ عليه قائلا: "مش هينفع نهين المصريين، لازم نعرف، إن كلنا واحد، الحق مش تنصر الظالم، لو حد فينا غلط يتحاسب، والكلام ينطبق علينا كلنا".

وأضاف الرئيس عبد الفتاح السيسى: "مقدرش أقول لو واحد غلط فى الداخلية تبقى الداخلية كلها وحشة".